香港的金牌音樂監製Mark
Lui，組成樂隊On-Line已經大半年，到今時今日先至推出首張專輯，大概是亞Mark太忙之故吧！而家玩樂隊的，個個都話難做，如果唔係因為鼎鼎大名的雷頌德，相信都幾難有On-Line的出現。的確，寂寂無名但又要玩band，簡直是妙想天開；但在有了名氣，再加上亞Mark的成功流行元素混合之後，能否以香港L'arc~en~Ciel自居，真是天曉得了！
一系列的主打歌如【反收購】、【你要飛】及【點夠喉】，都沒有刻意扮高深；易上口的旋律配上通俗的歌詞，再加band sound，其實不過係【越夜越有機】、【花花宇宙】等的搖滾版(尤其是【換個大場地】)，唔鹹唔淡，有點「騎牆派」。雷頌德深愛的「咿啞奧咿啞」和「Di Dum Da Di Dum Da」都仍然歷久長存，還有那些電子音效作配菜，要與日本的Glay或L'arc~en~Ciel作比較嗎？又似乎非他族類，有難以相提並論的感覺。其中【轟炸機】的intro似曾相識，乜唔係L'arc~en~Ciel的【Driver's High】…… ？【你真強】想玩重型，但技巧稚嫩；另外，On-Line亦重新唱了【發熱發亮】，效果不俗，成為了碟中較出色的作品。
以「兩頭唔到岸」的音樂成band，你可以話係聰明的小試牛刀做法，但真正專業的聽眾自然會「到喉唔到肺」。不過，香港又真係幾缺乏這類音樂，On-Line的所謂band
sound總比霆鋒的pop
rock較貼市，當然在編曲上亦較為多姿多采。若不是大家都對亞Mark期望過大的話，作為一隊初哥樂隊，On-Line應該可以過骨的了。